கவிதை குறித்த உரையாடல்

இத்தாலிய சினிமாவின் மிக முக்கியமான ஆளுமையான ராபர்ட்டோ பெனிக்னி ( Roberto Benigni ) இயக்கத்திலும் நடிப்பிலும் 2005 ம் ஆண்டு வெளிவந்த தி டைகர் அண்ட் தி ஸ்னோ ( The Tiger And The Snow )  என்ற திரைப்படத்தின் இரண்டு காட்சிகளில் வருகின்ற கவிதை குறித்த உரையாடல் . .

ஒரு காட்சி :

இரவு உறங்கச் செல்வதற்கு முன் நாயகனின் இரு மகள்களும் அவனிடம் நீங்கள் எப்படி கவிஞனாக மாறினீர்கள் என்று கேட்க, நாயகன் தான் கவிஞனான கதையைச் சொல்கிறான்.

• மகள் 1 : நல்ல கவிதைகளை எழுத எனக்குச் சொல்லிக் கொடுக்க முடியுமா?
• மகள் 2 : நீங்கள் எப்படி கவிஞனாக மாறினீர்கள்?
• மகள் 2 : எப்படி கவிதை எழுத ஆரம்பித்தீர்கள்?
• நாயகன் : இப்பொழுது நீங்கள் இருப்பதை விடவும் சிறுவனாக இருந்தேன், எட்டு அல்லது ஒண்பது வயது இருக்கும்
• அப்பொழுது என் தாயுடன் இருந்தேன். அவளை நான் அதிகமாக நேசித்தேன்
• ஒரு காட்டுக்குள் இருக்கிற எங்களுடைய மாமாவின் வீட்டில் இருந்தோம்
• உங்களுக்குத் தெரியுமா என்ன நடந்தது என்று? தெரியுமா?
• ஒரு சின்னப் பறவை பாடிக் கொண்டே பறந்து வந்தது. தாழ்வாக
• ரொம்ப ரொம்பத் தாழ்வாக
• அது என்னுடைய வலதுபக்க தோளின் மேல் வந்து உட்கார்ந்தது
• என்னால் உறுதியாகச் சொல்ல முடியும்
• எல்லா மனிதர்களையும் விட்டுவிட்டு அது என்னைத்தான் தேர்ந்தெடுத்தது
• நான் பயந்து விட்டேன், அது பறந்து போய்விட்டது, ஆக நான் என்னை ஒரு மரமாக உணர ஆரம்பித்தேன்
• என்னுடைய தோளை நான் அசைக்கவே இல்லை
• என்னுடைய இதயத் துடிப்பை உணர ஆரம்பித்தேன். நிஜமாகவே வேகமாக இருந்தது
• அப்புறம் அது தூரமாகப் பறந்து போய்விட்டது
• என் அம்மாவிடம் இதைச் சொல்ல வேண்டுமென்று விரும்பினேன்
• அம்மா, ஒரு சின்னப் பறவை பாடிக் கொண்டே பறந்து வந்தது
• கொஞ்ச நேரம் என்னுடைய தோளில் உட்கார்ந்திருந்தது
• அம்மா சொன்னாங்க, ஏதோ பயங்கரம் நடந்துருச்சுன்னு நினைக்கிறேன்னு. அப்படியே தொடர்ந்து பேச ஆரம்பிச்சிட்டாங்க
• மகள் 1 : ஆமா, பாட்டி மாதிரியே, சரி பாட்டி பறவைகளை விரும்பலையா?
• நாயகன் : இல்லை அப்படி இல்லை, பாட்டி சின்னச் சின்னப் பறவைகளை விரும்பினாள்.
• ஆனா அது பாட்டிக்கு நடக்கலையே, எனக்குத்தானே நடந்தது
• இது என்னுடைய தவறுதான், நடந்ததைச் சரியாகச் சொல்லத் தெரியவில்லை எனக்கு
• நான் உணர்ந்ததை அம்மாவை உணர வைக்க முடியவில்லை என்னால்
• நான் அதிகமாகக் குழம்பிப் போனேன். அப்புறம் எனக்குள்ளேயே நான் சொல்லிக் கொண்டேன்
• எந்த வேலையைச் செய்தாலும் சரியான வார்த்தையை உபயோகப்படுத்த வேண்டுமென்று
• அந்த வழியில் வார்த்தைகளைப் பயன்படுத்த நினைத்தேன்
• தன்னுடைய இதயத் துடிப்பை உணர்ந்தவனால் தான் அடுத்தவனுடைய இதயத் துடிப்பையும் உணர முடியும்
• அந்த நாள் நான் முடிவு செய்தேன் ஒரு கவிஞனாக ஆக வேண்டுமென்று
• ஏனென்றால், என்னுடைய இதயம்தானே துடித்தது, என்னுடையதுதானே பாட்டியோடது இல்லையே!

இன்னொரு காட்சி :

கல்லூரியின் வகுப்பறை. மாணவர்கள் கவனமாக உட்கார்ந்திருக்கிறார்கள். ஆசிரியர் வேகமான உடல் அசைவுகளோடும் உணர்ச்சிப் பெருக்கோடும் கவிதை எழுதுவது எப்படி என்று கற்றுக் கொடுக்கத் தொடங்குகிறார்.

• இப்பொழுதே காதல் கவிதைகளை எழுத ஆரம்பித்து விடாதீர்கள்
• ஏனென்றால் அது கடினமானது
• அப்படியும் எழுத வேண்டுமென்றால் உங்களுடைய எண்பது வயது வரையிலும் காத்திருங்கள்
• ஆக, இப்போதைக்கு எதைப்பற்றியாவது எழுதுங்கள்
• உதாரணமாக கடல், காற்று, ஒரு குளிர்விப்பான் இவைகளைப் பற்றி எழுதுங்கள்
• கவிதைக்கு அப்பாற்பட்டு இங்கே எதுவும் கிடையாது, எல்லாமுமே பாடுபொருள்தான்
• கவிதை இல்லாததிலிருந்து வருவதில்லை, இருப்பதில் இருந்து வருவதுதான் கவிதை
• கவிதை என்றால் என்ன? உண்மை என்றால் என்ன என்று கேட்காதீர்கள்
• கண்ணாடியைப் பாருங்கள், நீங்கள்தான் கவிதை
• எழுதத் தொடங்குங்கள் உங்களுடைய கவிதையை
• வார்த்தைகளைக் கவனமாகத் தேர்ந்தெடுங்கள்
• ஒரே ஒரு வார்த்தைக்காக சமயங்களில் எட்டு மாதமெல்லாம் காத்திருக்க வேண்டி வரலாம்
• ஆனாலும் தேர்ந்தெடுங்கள்
• தேர்ந்தெடுக்கத் தொடங்கும் பொழுதுதான் அழகு தொடங்குகிறது
• காதலிக்கத் தொடங்குங்கள், காதலிக்கவில்லை என்றால் எல்லாமே இறந்து போய்விடும்
• காதலிக்கத் தொடங்கும் பொழுதுதான் வாழ்க்கைக்குள் எல்லாமுமே வரத் தொடங்கும்
• மகிழ்ச்சியை செலவு செய்யுங்கள், உற்சாகத்தை சிதறச் செய்யுங்கள்
• வருத்தத்திலும் அமைதியிலும் ஆர்வத்தோடு இருங்கள்
• உங்களுடைய சந்தோஷங்களை மக்களின் முகங்களில் வீசி எறிங்கள்
• மகிழ்ச்சியைக் கொடுத்தீர்களானால் நீங்களும் மகிழ்ச்சியாயிருப்பீர்கள்
• உங்கள் துயரங்களைப் பகிர்ந்து கொள்ள நீங்கள் மகிழ்ச்சியாயிருக்க வேண்டும்
• மகிழ்ச்சியோடிருங்கள், கண்டிப்பாகத் துயரப்படுங்கள்
• துயரப்படுவதற்கு ஒருபோதும் பயப்படாதீர்கள்
• ஏனென்றால் ஒட்டுமொத்த உலகமே துயரத்தில் தான் இருக்கிறது
• உங்களிடம் இல்லாததற்காக ஒருபோதும் கவலைப் படாதீர்கள்
• கவிதை எழுத அவசியமாக தேவைப்படுவது ஒன்றுதான்
• அது என்னவென்றால்
• எல்லாமும்
• கவிஞன் வெறுமனே பார்க்கிறவன் இல்லை, அவன் உற்றுப் பார்க்கிறவன் உணர்கிறவன்
• உற்றுப் பாருங்கள்
• வார்த்தைகளை உங்களுக்குக் கீழ்ப்படியச் செய்யுங்கள்

ஜோசப் ராஜா

10.01.2013

(தை இதழில் பிரசுரித்த அன்பு அண்ணன்.அறிவுமதி அவர்களுக்கு நன்றி)