நம்புங்கள்
இது தற்காலிகமானது தான்
நம்புங்கள்
இவர்களும் தற்காலிகமானவர்கள் தான்
நிரந்தரமானது
இந்த நிலம்தான்
இந்த தேசம்தான்
நிரந்தரமானவர்கள்
இந்த மக்கள்தான்
மீண்டும்மீண்டும் சொல்கிறேன்
மக்களுக்குள் பிரிவினையை விதைத்தவர்கள்
மோசமான முடிவைத்தான் பெற்றிருக்கிறார்கள்
மக்களுக்குள் அச்சத்தைப் பரப்பியவர்கள்
அசிங்கமான முடிவைத்தான் பெற்றிருக்கிறார்கள்
தேசமென்பது மக்கள் திரள்தான்
மக்களில்லாமல் தேசமுமில்லை ஒன்றுமில்லை
தலைவர்கள் வருவார்கள் போவார்கள்
என்ன செய்தார்கள்
என்பதைப் பொறுத்தே
மக்களால் போற்றப்படுவதும்
மக்களால் தூற்றப்படுவதும்
மனிதகுலத்திற்கு எதிரான
எந்தத் தலைவனையும்
மனசாட்சியே இல்லாமல்
சிதைத்திருக்கிறார்கள் மக்கள்
மனிதகுலத்தின் மீது
பேரன்பு கொண்ட எந்தத் தலைவரையும்
எல்லைகளுக்கு அப்பாற்பட்டு
ஏந்திச்சுமந்து கொண்டாடியிருக்கிறார்கள் மக்கள்
வரலாற்றைப் படைக்கிறவர்கள் நீங்கள்
வரலாற்றைச் செதுக்குகிறவர்கள் நீங்கள்
தலைவர்கள் வழிநடத்துவார்கள்
மக்கள்தான்
தலைகீழாக மாற்றிக்காட்டுவார்கள்
மக்கள் வழிநடத்த சில நேரங்களில்
தலைவர்கள் உருவாகி வருவார்கள்
ஏதாவதொன்று நடந்தே தீரும்
இது வரலாற்று நியதி
இனி செய்ய வேண்டியதெல்லாம்
ஒன்றே ஒன்றுதான்
ஒன்றாக இருப்பதுதான்
ஒன்றாக இருப்பதுதான்
ஒவ்வொருவனையும் அச்சமூட்டுகிறது
ஒன்றாக இருப்பதை
எந்தவொரு முதலாளியும்
விரும்புவது கிடையாது
ஒன்றாக இருப்பதை
எந்தவொரு முதலாளித்துவ அரசும்
விரும்புவது கிடையாது
கொஞ்சம் யோசித்துப் பாருங்களேன்
மக்களுக்குள் எந்தவொரு பிரிவினையும்
இல்லாத போது
இவர்கள் ஏன்
மதம்பிடித்த யானையைப் போல
எல்லாவற்றையும்
கபளீகரம் செய்து கொண்டிருக்கிறார்கள்
மக்களுக்குள் எந்தவொரு வேற்றுமையும்
இல்லாத போது
இவர்கள் ஏன்
கொடிய வேட்டைக்காரனைப் போல
எல்லோரையும் வேட்டையாடிக் கொண்டிருக்கிறார்கள்
பணம் மட்டுமல்ல மதமும் மூலதனமாகும்
பணவெறி மட்டுமல்ல
மதவெறியும் பூமியை நிர்மூலமாக்கும்
பிரிவினைத் தீயில்
நாமெல்லாம் எரிந்து கொண்டிருக்கிறோம்
பிரிவினைத் தீயில்
அவர்களெல்லாம் குளிர்காய்ந்து கொண்டிருக்கிறார்கள்
உங்களுக்குத் தேவை வாழ்க்கை
அவர்களுக்குத் தேவை பணம்
வாழ்வின் மீதான ஆசை
பணத்தின் மீதான பேராசையை வீழ்த்தவேண்டும் !
நம்புங்கள்
இரவின் முடிவில் சூரியன் வரும்
நம்புங்கள்
ஒவ்வொரு வினைக்கும் எதிர்வினை நிகழும்
நம்புங்கள்
அழுத்த அழுத்த பெருவெடிப்பு நடக்கும்
நம்புங்கள்
பிரிவினைப் பேச்சுக்கள் ஒன்றிணைக்கும் மக்களை
நம்புங்கள்
வெறுப்பை விதைத்தவன் வெறுப்பை அறுப்பான்
நம்புங்கள்
மக்கள் எல்லாவற்றையும் கடந்து வருவார்கள்
நம்புங்கள் உங்களையே நீங்கள் நம்புங்கள்
உங்களைச் சுற்றியிருப்பவர்களை நம்புங்கள்
உங்களை சுற்றியிருப்பவர்களை நேசியுங்கள்
இது நம்பிக்கையாய் இருக்கவேண்டிய நேரம்
இது அன்பாயிருக்க வேண்டிய காலம்
உலகமே பார்த்தும் கேட்டும் அச்சப்பட்டிருந்த
அந்தக் கொடூர நாஜிக்களை
அந்தக் கொடூர நாஜிக்களின் கொடூரங்களை
அந்தக் கொடூர நாஜிக்களின் தலைவனை
அந்தச் சோசலிச நாட்டின் செஞ்சேனையானது
முற்றும் முழுவதுமாகத் துடைத்து விடவில்லையா
ஆபத்துக் காலங்களில் உச்சரிக்கப்படும்
மந்திர உச்சாடனங்களைப் போல
நீங்கள் நினைத்துக் கொள்ள வேண்டிய உண்மை
நம்புங்கள்
இருளை விரட்டப் பேரொளி பாயும்
வெறுப்பின் விதைகள் நம்பிக்கையின் நாற்றுகளாகும் !
ஜோசப் ராஜா
2 comments
வணக்கம் தோழர். நம்பிக்கையூட்டும் வரிகள்… காலத்தில் நிகழ்ந்துவரும் கலவரங்களையும் அதிகாரங்களையும் கட்டுப்போட கையிலிருக்கும் ஓட்டாயுதத்தை தமிழக மக்கள் சரியாகக் கையாளவேண்டியிருக்கிறது. அதற்கான மனக்குழப்பத்தை இக்கவிதை வரிகள் நம்பிக்கையுடன் போக்குவதாக அமைந்திருப்பதை உணர்கிறேன். நன்றியும் வாழ்த்துகளும்…
“வெறுப்பின் விதைகளும் நம்பிக்கையின் நாற்றுகளும்” எனும் கவிஞர் ஜோசப் ராஜாவின் கவிதை பதினெட்டாவது மக்களவைத் தேர்தல் சமயத்தில் வந்துள்ள பொருத்தமான கவிதை.
அக்கால இட்லரைப் போன்ற இக்கால ஆட்சியாளரைக் கண்முன் நிறுத்துகிறார் கவிஞர். இட்லருக்கு நேர்ந்த கதியை இன்றைய ஆளும் பாசிசவாதிகளும் அனுபவித்தே ஆக வேண்டும்.
ஏனெனில் ஒவ்வொரு வினைக்கும் எதிர்வினை உண்டென்பதே அறிவியல்.