வறண்ட நிலமும் திவாலான வங்கியும்

வறண்ட நிலங்கள்

வெடிக்கத் தொடங்கியிருக்கின்றன

குளங்களும் குட்டைகளும்

முழுவதுமாக வற்றத் தொடங்கியிருக்கின்றன

மரங்களின் இலைகள்

காய்ந்து உதிரத் தொடங்கியிருக்கின்றன

வீசும் காற்றும்

வெப்பத்தை ஏந்தத் தொடங்கியிருக்கிறது

நீர்நிலைகளைத் தேடி

பறந்துகொண்டிருக்கின்றன பறவைகள்

நீர்நிலைகளைத் தேடி

அலைந்து கொண்டிருக்கின்றன மிருகங்கள்

இத்தனைக்கும்

இன்னும் தொடங்கிடவில்லை கோடை

இத்தனைக்கும்

இன்னும் சுட்டெரிக்கவில்லை கத்தரி

ஆனபோதிலும்

அத்தனையும் அத்தனையும்

வியர்வைச்சுரப்பிகளை

வேகமெடுக்கச் செய்யப்போகும்

பெருங்கோடையை முன்னறிவிப்பது போல

வேகமாக அதிகரிக்கும் விலைவாசியேற்றமும்

வேகவேகமாக உயர்ந்துகொண்டிருக்கும் பணவீக்கமும்

ஒவ்வொரு நாடுகளின்

பொருளாதார நரம்புகளையும்

துண்டித்துப்போடும் மந்தநிலையும்

உலகத்தை வழிநடத்தப்போகும்

தலைமைப்பதவிக்காக

உருவாக்கப்படும் கொடூர யுத்தங்களும்

வங்கிகளிலிருந்து

கொடுக்கப்படும் கடன்களால்

பொதுத்துறை நிறுவனங்களிலிருந்து

கொடுக்கப்படும் கடன்களால் என

கடன்களால் மட்டுமே நிறைந்திருக்கும்

முதலாளிகளின் வயிறுகளும்

ஒவ்வொரு தேசத்திலும்

அதிகரித்துக் கொண்டிருக்கும்

வேலையிழந்தவர்களின் எண்ணிக்கையும்

திவாலனது வங்கி என்று

திடீரென வெளிப்படும் அறிவிப்புகளும்

எதை முன்னறிவிக்கின்றன

முதலாளிகளால் முதலாளிகளுக்காகவே

ஏற்படுத்தப்படும் வங்கிகள்

முதலாளிகளால்தானே திவாலாகின்றன