பயணத்தில் வீசும் சுகமான காற்று

நீண்ட தூரமோ

குறைந்த தூரமோ

ஒரு பயணம் என்பது

கணப்பொழுதின் இளைப்பாறுதல்

ஒரு பயணம் என்பது

அன்றாடத்தை அலசிப்பார்ப்பது

ஒரு பயணம் என்பது

எதிர்காலத்தை எண்ணிப்பார்ப்பது

ஒரு பயணம் என்பது

எல்லாவற்றையும் பார்க்கச்செய்வது

அப்படியாகத் தொடங்கிய பயணத்தில்

மாபெரும் மானுடத்திரளின்

உழைப்பைத் தின்று செரித்து

பெருத்திருக்கும் இந்த நகரம்

ஒரு குப்பையைப் போல

அடித்துச் செல்லப்படுவதைப்

பார்க்கப்பார்க்கப் பரவசமாக இருக்கிறது

காற்று வீசுகிறது

பயந்த குழந்தையை மூடிக்கொள்ளும்

தாயின் புடவையைப்போல

காற்று முழுவதுமாக மூடிக்கொள்கிறது

முகத்தில் வேகமாக வீசும் காற்று

இதயத்தின் களைப்பை

இருந்த இடம் தெரியாமல்

அகலச் செய்கிறது

மனிதனால் இன்னும்

மாசுபடுத்தப்படாத காற்றை

ஆழமாக உள்வாங்குகிறேன்

சுத்தமான காற்றால்

நுரையீரல் நுரைத்துப் பொங்குகிறது

உடலின் வழியாக

இதயத்திற்குள் நுழைகிறது காற்று

இதயத்தின் பரவசத்தை

வார்த்தைப்படுத்தத் துடிக்கின்றன விரல்கள்

பரந்த வானத்தைப்

பார்த்துக் கொண்டிருக்கிறேன்

நட்சத்திரம் ஒன்று எரிந்து விழுகிறதை

இமைகொட்டாமல் பார்த்ததில்

ஒருகணம் குழந்தையாகிறேன்

மறுகணம் கவிஞனாகிறேன்

விழுந்த நட்சத்திரம்

விதைத்து விட்டதில்

இதயத்தை இருள் சூழ்ந்து கொள்கிறது

வெறுமையையும் மெளனத்தையும்

உணரத் தொடங்குகிறேன்

நிலா ஒளிர்ந்து கொண்டிருக்கும்

நட்சத்திரங்கள் ஒளிர்ந்து கொண்டிருக்கும்

இந்த வானத்தைப் போலத்தான்

இருக்குமா பாலஸ்தீனத்தின் வானம்

நான் உணர்ந்ததைப் போல

யாராவது ஒரு பாலஸ்தீனன்

இந்தக் காற்றை உணர்வானா

என்னை ஆற்றுப்படுத்தியது போல

யாராவது ஒரு பாலஸ்தீனனை

ஆற்றுப்படுத்துமா இந்தக் காற்று

என்ற எண்ணங்கள்

இதயத்தின் ஆழத்திலிருந்து

மேலெழுந்து வரவர

காற்று சுமையாகிக் கொண்டிருப்பதை

உணரத் தொடங்குகிறேன்

இப்போது இந்த வானத்தை

பார்க்க முடியவில்லை என்னால்

இப்போது இந்த நட்சத்திரங்களை

இரசிக்க முடியவில்லை என்னால்

உண்மையைச் சொன்னால்

நட்சத்திரங்களில் எல்லாம்

படுகொலை செய்யப்பட்ட

பாலஸ்தீனக் குழந்தைகள்

ஒளிர்ந்து கொண்டிருக்கிறார்கள்

சுயநலம் பிடித்த

இந்த மானுடத்திரளை

பரிகாசம் செய்து

சிரித்துக் கொண்டிருக்கிறார்கள்

காற்றின் சுமையைத்

தாங்க முடியாமல் தள்ளாடுகிறேன்  

இப்போது என் நினைவெல்லாம்

இது மட்டும்தான்

இந்தப் பயணம் மட்டுமல்ல

அந்தப் படுகொலைகளும்

முடிய வேண்டும்

தோழர்களே

உங்கள் வானம் எப்படி இருக்கிறது?

நீங்கள் காற்றை எப்படி உணர்கிறீர்கள்?

ஜோசப் ராஜா