காற்றில் சுழன்று கொண்டிருக்கின்றன

82 வயதாகும் பாப் டைலான், கிட்டத்தட்ட ஐம்பதாண்டுகளுக்கும் மேலாகத் தன்னுடைய இதயத்திலிருந்து வழியும் இசையால் அமெரிக்கா மட்டுமல்ல உலகத்தின் இசை ரசிகர்களின் இதயத்தில் நீங்கா இடம் பிடித்தவர். அமெரிக்காவின் அதிகாரத் திமிரிலிருந்து தொடங்கப்பட்ட வியட்நாம் யுத்தம் தொடங்கி, போருக்கு எதிராகத் தொடர்ந்து பாடியவர். மூச்சிறைக்க ஜனநாயகம் பேசும் அமெரிக்க சமூகத்தில் எங்கும் பரவியிருந்த கறுப்பின மக்களின் பிரச்சனைகளைத் தன்னுடைய இசையில் வெளிப்படுத்தியவர். ஒரு கலைஞனாகத் தன்னைச் சுற்றி நிகழும் எல்லாவற்றையும் தன்னுடைய இசையில் பிரதிபலிக்கச் செய்தவர்.

ஒருகையில் கிட்டாரோடும், கழுத்தில் தொங்கவிடப்பட்டிருக்கும் ஹார்மோனிகாவோடும் ஆழமாக ஊடுருவும் கண்களைக் கொண்ட டைலானின் புகைப்படத்தை முதல்முறையாகப் பார்த்த நினைவுகள் இன்னும் எனக்குள் பசுமையாக இருக்கின்றன. முதலாளித்துவத்தின் கோரத்தை, முதலாளித்துவத்தின் கோர விளைவுகளை, சமூக வாழ்க்கையின் மீது முதலாளித்துவம் தொடுத்த யுத்தத்தை உரக்கப் பாடியவர் பாப் டைலான்.

இப்போதும் இந்த உலகம் யுத்தத்தில்தான் நின்று கொண்டிருக்கிறது. இப்போதும் இந்த தேசத்தில் கலவரங்கள்தான் தொடர்ந்து கொண்டிருக்கின்றன. மானுடத்திரளின் துயரங்கள் மேலும் அதிகரித்திருக்கின்றன. மாற்றத்திற்கான ஏக்கப் பெருமூச்சுகள் எங்கும் எங்கெங்கும் ஒலித்துக் கொண்டிருக்கின்றன.

விசை செலுத்தப்படாமல் எதுவும் நிகழாது என்பதை நான் சொல்ல வேண்டியதில்லை. இதோ தன்னுடைய கிட்டாரின் நரம்புகளிலிருந்து ஒவ்வொரு மனிதனின் நரம்புகளுக்குள்ளும் பாப் டைலான் செலுத்திய விசையைப் பாருங்கள். 1962 ல் வெளியிடப்பட்ட அவருடைய புகழ்பெற்ற படைப்பான ”காற்றில் சுழன்று கொண்டிருக்கின்றன” என்ற பாடலின் வரிகளைப் படித்துப் பாருங்கள்,

வெறுப்பிற்கு எதிராக அன்பையும், பிரிவினைக்கு எதிராக ஒற்றுமையையும், கள்ள மெளனத்தை உடைத்தெறியும் கவிதைகளையும் கைப்பற்றிக்கொள்ளுங்கள். எனக்கு நன்றாகத் தெரியும். நீங்கள் வாழத்தான் விரும்புவீர்கள் என்று.