கார்த்திகை தீப மாவளி – ஆவணப்படம்

ஆசியப் பண்பாட்டு ஆராய்ச்சி மையத்தின் ஒருங்கிணைப்பில் நண்பர் விஜய் அவர்கள் இயக்கியிருக்கும் கார்த்திகை தீப மாவளி என்ற ஆவணப்படத்தை இன்று காலையில் பார்த்தேன். இரண்டு வருடங்களுக்கு முன்னால் எங்கள் பேராசிரியர் கேட்டுக் கொண்டதன் பேரில், திருவண்ணாமலைக்குப் பக்கத்தில் இருக்கும் அவருடைய கிராமத்திலிருந்து நூற்றுக்கணக்கான மாவளிகளைச் செய்து கொண்டுவந்தார் விஜய். அந்தத் தீபத் திருநாளை எல்லோரும் மாவளி சுற்றி மகிழ்ச்சியாகக் கொண்டாடினோம். இந்த ஆவணப்படத்திற்கான விதை அன்றே விழுந்திருக்கும் என்று எண்ணுகிறேன். முதல் படைப்பை முழுமையான படைப்பாகக் கொண்டு வந்ததற்காக வாழ்த்துகள் விஜய்.

வாடைக்காற்று வட்டமிட்டுக் கொண்டேயிருக்கும் கார்த்திகை மாதத்தை, அதன் பனியை, அதன் குளிரை நக்கீரனாரின் நெடுநல்வாடையில் காணலாம். இந்த ஆவணப்படத்தின் முதல் பதினாறு நிமிடங்கள் காட்சிக் கவிதையான நெடுநல்வாடையைக் காட்சிப்படுத்த முயன்றிருக்கிறார். அந்தக் காட்சிகள் அற்புதமாகவும் வந்திருக்கிறது. எங்கள் பேராசிரியர் அண்ணாதுரை அவர்களின் நீண்டநாள் கனவு, நெடுநல்வாடையைக் காட்சிப்படுத்த வேண்டுமென்பது. விஜய் தன்னுடைய சக்திக்கு மீறி அதை நிறைவேற்ற முயற்சி செய்திருக்கிறார். மாவளி சுற்றுதல், சொக்கப்பனை கொளுத்துதல், தீபம் ஏற்றுதல் என கார்த்திகை மாதமானது தீபங்களால் நிறைந்தது. கார்த்திகை மாதமென்பது ஒளியால் நிறைந்தது. ஒளியைக் காட்சிப்படுத்துவதென்பது ஒருவகையில் ஒளியாகவே மாறுவதற்குச் சமமானதுதான்.

ஒளியைப் பார்த்துக் கொண்டே இருந்தால், ஒளியாகவே மாறிவிடுவீர்கள். முதன்முதலில் ஒளியைத் தரிசித்த அந்த ஆதிமனிதனின் இதயத்துடிப்பு எப்படி இருந்திருக்கும் என்று நினைத்துப் பாருங்களேன். இறைவன் ஒளியாகப் பார்க்கப்படுவதும், ஒளி இறைவனாகப் பார்க்கப்படுவதும் ஏனென்ற காரணம் புரியக்கூடும். கிறிஸ்து பிறப்பை ஒளிரும் வால்நட்சத்திரம் உலகிற்குச் சொல்கிறது, நபிகளின் வானத்தில் பிறை ஒளிர்ந்து கொண்டிருக்கிறது. சிவன் ஒளியாகவே காட்சி தருகிறார். ஒளிக்கும் மனிதகுலத்திற்குமான பிணைப்பு வாழ்க்கையோடு இணைந்தது. ஒளியில்லாமல் பிரபஞ்சம் இல்லை. ஒளியில்லாமல் ஒன்றுமே இல்லை. அதனால்தான் ஒளி வணங்கப்படுகிறது. இந்த ஆவணப்படத்தில் தங்கள் நிலத்திற்கு விளக்கேற்றும் காட்சியைப் பார்க்கும்பொழுது எழுந்த உணர்வு விவரிக்க முடியாதது.

ஒளிரும் நட்சத்திரங்கள் பரவசம் கொடுக்கக்கூடியது. ஒளிரும் விளக்குகள் இருளை மட்டுமல்ல இதயத்தையும் விழிப்படையச் செய்யக்கூடியது. நிலவொளி, சூரியஒளி, நட்சத்திரங்களின் ஒளி என இந்தப் பிரபஞ்சமே ஒளிமயமானதுதான். இந்தப் பிரபஞ்சம் ஓயாமல் விளையாடும் விளையாட்டும் ஒளி விளையாட்டுதான். மாவளி சுற்றுதல் கூட, இந்த மண்ணின் உழைக்கும் மக்களால் நீண்ட காலங்களாகக் கடைப்பிடிக்கப் பட்டுக் கொண்டிருக்கும் ஒளி விளையாட்டுதான். சில பாறை ஓவியங்களில் இன்னும் ஒளிர்ந்து கொண்டிருக்கிறது இந்த ஒளி விளையாட்டு. இந்த ஆவணப்படத்தின் இறுதியில் சில நிமிடங்கள் நீளும் அந்த ஒளி விளையாட்டு, அந்தக் காட்சிக் கவிதை நிச்சயமாக உங்களை உற்சாகப் படுத்துமென்று உறுதியாக நம்புகிறேன்.