பாலஸ்தீனத்திற்கு ஆதரவான பேரணி

உங்களுக்குத் தெரிந்திருக்கும். பாலஸ்தீனத்திற்கு ஆதரவாக உலகின் ஒவ்வொரு மூலைமுடுக்குகளிலும் போராட்டங்கள் தொடர்ந்து நடந்து கொண்டிருக்கின்றன. காஸாவின் பேரழிவைத் தொடர்ந்து, இன்று ரஃபாவும் பேரழிவுக்கு உள்ளாக்கப்பட்டிருப்பதைப் பார்த்து இதயம் கசந்து எத்தனையோ பிரபலங்கள், எத்தனையோமுற்போக்காளர்கள் சுதந்திர பாலஸ்தீனத்திற்காக குரல்கொடுக்கத் தொடங்கியிருக்கிறார்கள். பாலஸ்தீனத்தை தனிநாடாக அங்கீகரிப்பது தங்களுடைய தார்மீக கடமையென்று ஒவ்வொரு நாடாக பாலஸ்தீனத்தின் பக்கம் நெருங்கி வந்து கொண்டிருக்கின்றன.

பாலஸ்தீனத்தை கபளீகரம் செய்து கொண்டிருக்கும் இஸ்ரேலுக்கு ஆயுத உதவி செய்து கொண்டிருக்கும் அமெரிக்க உள்ளிட்ட நாடுகள்கூட தங்கள் சொந்த மக்களின் இதயங்களிலிருந்து எதிர்ப்பைச் சம்பாதித்துக் கொண்டிருக்கின்றன. குறிபார்த்துக் குழந்தைகள் கொல்லப்பட்டுக் கொண்டிருப்பதை இதயமுள்ள யாரும் ஏற்றுக்கொள்ளத் தயாராக இல்லை என்பதுதான் உண்மை. மீண்டும் ஒருமுறை போரின் கொடுமைகளை இந்த உலகம் பாலஸ்தீனத்தின் பேரழிவின் வழியாகப் பார்த்துக் கொண்டிருக்கிற இந்த நேரத்தில், மார்க்சிஸ்ட் கம்யூனிஸ்ட் கட்சியின் சென்னை மாவட்டக் குழுக்கள், சிந்தாதிரிப்பேட்டையில் நடத்திய பாலஸ்தீனத்திற்கு ஆதரவான பேரணியில் கலந்துகொண்டு, தொடர்ந்து நடந்த பொதுக்கூட்டத்தில் கவிதை வாசிக்க கேட்டுக்கொண்டார், மத்திய சென்னை மாவட்டச் செயலாளரும் அன்புத் தோழருமான ஜி.செல்வா.