வரலாறு படிப்பவனிடம் தொழிலாளியின் கேள்விகள்

இருபதாம் நூற்றாண்டின் தவிர்க்கமுடியாத நாடக ஆசிரியரும், கவிஞருமான பெர்தோல்ட் பிரெக்ட் 1898 ல் ஜெர்மனியில் பிறந்தார். அவரது காலகட்டத்தில் நடந்த இரண்டு உலகப்போர்களுமே அவருடைய வாழ்விலும், எழுத்திலும் பெரும் தாக்கத்தை ஏற்படுத்தின. ஒரு கலைஞனாக எப்போதுமே மக்களுக்காகக் குரலெழுப்பியவர் பிரெக்ட். அவரது காலகட்டத்தில் பூக்கத் தொடங்கிய புரட்சியின் கருத்துகளால் ஈர்க்கப்பட்டவர், அந்தக் கருத்துக்களைத் தன்னுடைய எழுத்திலும் பிரதிபலித்தவர்.  அதனால்தான் பெருவாரியான மக்களால் விரும்பப்பட்டும் கூட, மனிதகுல விரோதிகளான நாஜிக்களால் வெறுக்கப்பட்டார். தொடர்ந்து ஜெர்மனி தேசமானது நாஜிக்களின் ஆளுகையின் கீழ் வந்ததும், டென்மார்க்கிற்கு இடம்பெயர்ந்தார். ஐரோப்பாவில் நாஜிக்கருத்துகள் அதிகரிக்கத் தொடங்கியதைத் தொடர்ந்து, பிரெக்ட் அமெரிக்காவிற்கு இடம்பெயர்ந்தார். சில ஹாலிவுட் திரைப்படங்களில் வேலைசெய்தார்.  முதல் உலகப்போரின் முடிவையொட்டி அமெரிக்காவில் கம்யூனிஸ்டுகளை வேட்டையாடும் நடவடிக்கைகள் அதிகரிக்கத் தொடங்கியது. பிரெக்ட்டும் நேரடியாகவே விசாரிக்கப்பட்டார். அதற்குமேல் அந்த நிலமும் அவருக்கு வறண்டுபோக, மீண்டும் சுவிட்சர்லாந்திற்கு குடிபெயர்ந்தார்.

புரட்சியின் ஊற்றுக்கண்ணான சோவியத் யூனியன், தலைவர் ஜோசப் ஸ்டாலினின் தலைமையில், கொடுங்கோலன் ஹிட்லரின் ஜெர்மனியை மட்டும் வெற்றிகொள்ளவில்லை. உலகெங்கிலும் ஜனநாயகத்திற்கு எதிராக இருந்த ஒவ்வொரு எதிரியையும் வெற்றிகொண்டார்கள் சோவியத் யூனியனைச் சேர்ந்தவர்கள். அதனைத் தொடர்ந்து சோசலிஸ கிழக்கு ஜெர்மனி, புலம்பெயர்ந்து நாடுநாடாகப் பயணித்துக் கொண்டிருந்த பிரெக்டை இருகரம் நீட்டி அழைத்துக்கொண்டது. அன்றிலிருந்து இறக்கும் வரையிலும் சோசலிசக் காற்றைச் சுவாசித்துக் கொண்டும், சோசலிசம் குறித்துச் சிந்தித்துக் கொண்டும் அங்கேயே வாழ்ந்தார். புதிய உலகின் உதாரணமான சோவியத் யூனியனை இதயத்தின் ஆழத்திலிருந்து நேசித்தவர் பிரெக்ட். அந்தப் புதிய உலகை நீண்டகாலம் கட்டிக்காப்பாற்றிய தலைவர் ஜோசப் ஸ்டாலின் மீது மிகுந்த அன்பு வைத்திருந்தவர் பிரெக்ட். எதிரி யாரென்று தெளிவாய்த் தெரிந்துகொண்டவர், கலைஞன் யாருக்காகப் பேசவேண்டும் என்பதில் தெள்ளத் தெளிவாய் இருந்துவந்தவர். அதனால்தான் இன்றும் நினைக்கப்படுகிறார், இனியும் நினைக்கப்படுவார் பெர்தோல் பிரெக்ட்.

உலகத் தொழிலாளர்கள் பற்றி அதிகமாகப் பேசப்படும் இந்த மே மாதத்தில், வரலாற்றின் பெருமிதங்களாகச் சொல்லப்படும் ஒவ்வொன்றின் மீதும் தொழிலாளியின் குரலில் கேள்விக்கணைகளை வீசியெறியும் பெர்தோல்ட் பிரெக்ட்டின், என்றும் எனக்குப் பிடித்த இந்தக் கவிதையை உங்களோடு பகிர்ந்துகொள்வதில் பெருமகழ்ச்சி அடைகிறேன். உங்களுடைய வரலாற்றுப் பெருமிதங்களை நோக்கி பிரெக்டைப்போல நீங்களும்கூட இப்படிக் கேட்டுப்பார்க்கலாம். . .